Хитой фуқаролар орасидан танлаб олинган тайконавтни орбитал станцияга юборди

Хитой ўзининг "Тянгун" орбитал станциясига уч экипаж аъзоси билан “Шэнчжоу-16” космик кемасини жўнатди. Учириш 30 май, сешанба куни Пекин вақти билан соат 09:31да (Тошкент вақти билан 06:31) мамлакат шимолидаги Цзюцюан космодромидан "Чанчжэн-2F" ракета ташувчиси ёрдамида амалга оширилди. Уни Хитой марказий телевидениеси жонли эфирда намойиш этди.

Кейинроқ Хитойнинг бошқариладиган космик парвозлар дастури бўйича бошқармаси учириш муваффақиятли ўтганига аниқлик киритди. Идора маълумотларига кўра, космик кема аниқ белгиланган орбитага чиққан ва нормал ишламоқда.

Экипаж командири, генерал-майор Цзин Хайпэн учун ушбу ҳодиса тўртинчи космик парвоз бўлиб, бу Хитой астронавтикаси учун рекорддир. Бортда ундан ташқари муҳандис Чжу Янчжу ва фойдали юклама бўйича мутахассис Гуй Хайчао ҳам бор. Улар станцияда ишлайдиган тайконавтларнинг ҳозирги учлигини алмаштиради.

Гуй Хайчао - тарихдаги биринчи фуқаролик тайконавти: ҳозиргача ХХРдан фақат Хитой Халқ-озодлик армияси зобитлари коинотга учган. Пекиндаги Бэйхан университети профессори, 36 ёшли Гуй Хайчао станциядаги вақтида илмий тажрибалар ўтказишга масъул бўлади.