Osiyo o‘yinlari. O‘zbekistonlik ikki dzyudochi yarim finalda

Bugun, 29 avgust kuni o‘zbekistonlik dzyudochilar Osiyo o‘yinlaridagi ishtiroklarini boshlashdi.

-60 kg vazn toifasidagi Diyorbek O‘rozboyev bahslarga nimchorak finaldan kirishdi. U dastlabki raqibi, hindistonlik Yadav Vijay Kumarni ippon bahosi bilan mag‘lub etib, chorak finalga yo‘l oldi.

Chorak finalda esa Xitoy Taypey vakili Yang Yungveyni vazari bahosi bilan mag‘lub etib, yarim finalga yo‘l oldi.

Endi u final yo‘llanmasi uchun janubiy koreyalik Li Harim bilan bellashadi.

-66 kg vazn toifasidagi Shahram Ahadov tojikistonlik Yoqubjon Boqiyevdan ippon bahosi bilan ustun keldi va chorak finalga yo‘l oldi. U chorak finalda Shimoliy Koreya vakili Kim Hyongunni vazari bahosi bilan mag‘lub etdi va yarim finalga chiqdi.

Endi u final yo‘llanmasi uchun janubiy koreyalik An Baul bilan kurashadi.

-48 kg vazn toifasi vakili Diyora Keldiyorova ilk davrada laoslik raqibasini mag‘lub etdi va chorak finalga chiqdi. Ammo u chorak finalda yaponiyalik sportchi Kondo Amiga yutqazib qo‘ydi. Bronza uchun o‘tish bahslarida ishtirok etgan Keldiyorova shimoliy koreyalik Joy Yu Sundan ham mag‘lub bo‘ldi.

Nimchorak final doirasida yana bir o‘zbekistonlik sportchi, -52 kg vazn toifasidagi Gulnoza Ziyayeva esa hindistonlik dzyudochini mag‘lub etib chorak finalga chiqdi.