Karmana tumaniga yangi hokim tayinlandi

2024 yil 16 yanvar kuni Xalq deputatlari Karmana tumani Kengashining navbatdan tashqari 77-sessiyasi bo‘lib o‘tdi. Sessiyada Navoiy viloyati hokimi N.Tursunov, sektor rahbarlari, viloyat hokimi o‘rinbosarlari, xalq deputatlari tuman Kengashi deputatlari, tuman hokimi o‘rinbosarlari, tashkilot va korxonalar rahbarlari, ommaviy axborot vositalari vakillari ishtirok etishdi.

Tashkiliy masala ko‘rib chiqilgan mazkur sessiya ishida viloyat rahbari N.Tursunov so‘zga chiqib, tuman hokimi lavozimiga Adizov Valijon Yusupovichni tayinlash to‘g‘risida qabul qilingan viloyat hokimining qarorini o‘qib eshittirdi.

Ushbu qaror xalq deputatlari Karmana tumani Kengashi deputatlari tomonidan ma’qullandi.

Valijon Adizov bunga qadar Raqobatni rivojlantirish va iste’molchilar huquqlarini himoya qilish qo‘mitasi Navoiy viloyati hududiy boshqarmasi boshlig‘i o‘rinbosari lavozimida ishlab kelgan.

Faxritdin Umarov 2016 yildan buyon Karmana tumaniga hokimlik qilib kelgandi. 2023 yil oktyabr oyi oxirida prezident Shavkat Mirziyoyev tuman rahbarlarini ishdan olishga ko‘rsatma bergandi. Bunga tuman hududidagi mayning fermalar sabab bo‘lgandi.