Литва Сейми Россия ва Беларус фуқаролари учун чекловларни узайтирди

Литва Сейми (бир палатали парламент) Россия ва Беларус фуқароларига нисбатан санкцияларни бир йилга - 2025 йил 2 майгача узайтирди, деб хабар берди dpa агентлиги 25 апрел, пайшанба куни.

Энг муҳим янгилик қишлоқ хўжалиги маҳсулотлари ва Россия ёки Беларусдан келадиган озуқаларни Литвага олиб киришни тақиқлаш бўлди, дея таъкидлайди Литва миллий телевидениеси. Тақиқланган озиқ-овқат ва озуқаларнинг аниқ рўйхати ҳукумат томонидан тасдиқланади. Сеймнинг 109 депутати санкциялар тўғрисидаги қонунни узайтириш учун овоз берди, икки нафари қарши чиқди, саккиз нафари бетараф қолди. 

Ўтган йили қабул қилинган ва бугунги кунда Украинадаги уруш билан боғлиқ бўлган қонунга кўра, россияликлар ва беларуслар учун Литва визаси ва электрон резидент мақомини олиш имконияти чекланган, бу эса Россия фуқароларининг Литвага келиш ва кўчмас мулк сотиб олиш имкониятини янада мураккаблаштиради, шунингдек, Литвада вақтинчалик яшаш учун виза олишда уларнинг аризалари қабул қилинмайди. 

Россия ва Беларус фуқароларининг ўз ватанига чиқиб кетишига чеклов кўриб чиқилмади 

Парламент йиғилишида россияликлар ва беларусларнинг ўз ватанига сафарларини чеклаш таклифи кўриб чиқилмади, чунки бунинг учун етарли овозлар бўлмади. Шу ҳафта Сейм тегишли таклифларга қарши чиқди. 

Парламентда чекловларнинг иккита варианти овозга қўйилди. Биринчиси, ўз мамлакатига йилига бир мартадан кўпроқ сафар қиладиган россияликлар ва беларусларнинг яшаш учун рухсатномаларини бекор қилишни кўзда тутади - уни йиғилган 112 депутатдан 20 нафари қўллаб-қувватлади, 47 киши қарши чиқди ва 45 депутат бетараф қолди. 

Иккинчи таклиф уч ойда бир мартадан кўпроқ сафарлар учун шунга ўхшаш санкцияларни назарда тутган. Уни 41 депутат қўллаб-қувватлади, 37 нафари қарши овоз берди, 39 нафари бетараф қолди. Натижада вариантлардан ҳеч бири керакли бўлган кўпчилик овозни ололмади.