Olaf Shols "boshqa Rossiya" bilan ko‘priklarni buzmaslikka chaqirdi

Yevropa Kengashi sammitida Germaniya kansleri Olaf Shols prezident Vladimir Putin va uning hukumatiga qarshi bo‘lgan “boshqa Rossiya” bilan ko‘priklarni buzmaslik tarafdori ekanligini ma’lum qildi. 46 ishtirokchi davlatdan 30 dan ortiq davlat va hukumat rahbarlari ishtirok etayotgan sammit avvalida Shols aytishicha, Rossiyaning Ukrainaga qarshi urushi bir nuqtada tugaydi. “Bir narsa aniq – bu Putin imperializmining g‘alabasi bilan tugamaydi”, — dedi Germaniya kansleri.

Uning so‘zlariga ko‘ra, Ukraina adolatli tinchlikka erishilmaguncha yordam oladi. “Ungacha biz, Yevropa Kengashi, boshqa Rossiya, boshqa Belarus vakillari bilan ko‘prik bog‘lashimiz va shu tariqa har ikki davlatning demokratik, tinch kelajagi imkoniyatini saqlab qolishimiz kerak”, — dedi u. Shu bilan birga, u Rossiyani Ukrainadagi harbiy jinoyatlari uchun izchil jazolashga chaqirdi. Bunga sammit doirasida yaratilgan Ukrainaga yetkazilgan yo‘qotishlarning xalqaro reyestri yordam berishi kerak.

16 may kuni Islandiya poytaxti Reykyavikda Yevropa Kengashiga 46 a’zo davlat rahbarlarining to‘rtinchi sammiti boshlandi. Uchrashuvdan ko‘zlangan asosiy maqsad Rossiyaning Ukrainaga bo‘lgan tajovuzi natijasida qit’ada yuzaga kelgan vaziyatni muhokama qilishdan iborat. Sammit doirasida Ukrainaning Rossiya agressiyasidan ko‘rgan yo‘qotishlari reyestri yaratilishi e’lon qilingan, bundan tashqari, Buyuk Britaniya va Niderlandiya Kiyev uchun F-16 samolyotlarini sotib olishda koalitsiya tuzishga kelishib oldilar.